 | The English Charlemagne Romances |  |
60
Euerichone þei token here red,& deden as þe king ham bed,
To ih'u crist þei deden here bone,
& swete ih'u herde ham sone.
A whit coluere þer cam fle,
Þat al þe peple miȝten se,
On otuweles heued he liȝte,
Þoru þe uertu of godes miȝte.
& otuwel, þat douȝti kniȝt,
Wiþ-drouȝ him anoon riȝt
Fram roulond, & stod al stille,
To fiȝte more he ne hadde wille,
& seide, “Roulond þou smitest fol sore,
Wiþ-drau þin hond & smiȝt na more.
ȝef þou wolt holden þat þou me het,
Þat i sschal wedde þat maiden swet,
Þe kinges douȝter, belesent,
For soþe, þan is mi wille went,
ȝef i sschal wedden þat faire may,
Ich wille bileuen oppon þi lay,
& alle myne godes forsake,
& to ȝoure god ich wille take.”
| The English Charlemagne Romances | |