University of Virginia Library

Fulgencius.

& vorto be þe sikerore he wende to scotlonde
& made him þere gret ost of landfolc in þe londe
& wende ofte vpen him & slou & barnde vaste
Ac euere adde þe emperour þe maistrie atte laste
Þe emperour here in þise lond weddede a wif
Þat was fulgences soster al in þis strif
Bi hire he adde an gode sone icluped basian
Anoþer he adde ihote gec þat he at rome biwan
Þo fulgence isei þat he ne miȝte aȝen stonde
To þe lond of scicye he wende out of þis londe
& a gret ost of picars was cheuentein he was
Of stalwardemen he gaderede to helpe him in þis cas
Þo he adde imad him a vair ost of þis ȝonge bachelerie
He com aȝen in to þis lond out of scicye
He bilay verst euerwik vpe þe emperour vaste
So þat þe emperour him ȝef bataile atte laste
Ac Mochedel of þis lond To fulgence toke
Vor he more of kunde was & þe emperour vorsoke
Bataile hii smite strong inou & slowe vaste to gronde
So þat fulgence þere adde deþes wounde
Ac þe emperour was al aslawe & ibured at euerwik
Ac fulgence deide suþþe þo he adde ileye sik
Þo þis men were boþe ded me moste abbe an king
Bituene þe romeins & þis lond þer wax þo striuing
Gec þe emperoures sone þe romeins to kinge nome
Vor he was of fader & moder of þe kunde of rome
Ac þe brutons of þis lond nome basian þer to
Vor is moder was of þis lond & is vncle al so
Þo þer were tueie kinges þus þer nas noȝt wel gret loue
Ne miȝte þei hii breþren were ar þe on was aboue
So þat hor eiþer vp oþer worrede vaste
& an bataile strong inou smite atte laste
& basian & is poer slowe get is broþer
& basian bileuede king þo þer nas non oþer