 | The Poetry of Robert Burns |  |
13
THERE WAS A LAD
Chorus
Robin was a rovin boy,Rantin, rovin, rantin, rovin,
Robin was a rovin boy,
Rantin, rovin Robin!
I
There was a lad was born in Kyle,But whatna day o' whatna style,
I doubt it's hardly worth the while
To be sae nice wi' Robin.
II
Our monarch's hindmost year but aneWas five-and-twenty days begun,
'Twas then a blast o' Janwar' win'
Blew hansel in on Robin.
III
The gossip keekit in his loof,Quo' scho:—‘Wha lives will see the proof,
This waly boy will be nae coof:
I think we'll ca' him Robin.
14
IV
‘He'll hae misfortunes great an' sma',But ay a heart aboon them a'.
He'll be a credit till us a':
We'll a' be proud o' Robin!
V
‘But sure as three times three mak nine,I see by ilka score and line,
This chap will dearly like our kin',
So leeze me on thee, Robin!
VI
‘Guid faith,’ quo' scho, ‘I doubt you, stir,Ye gar the lasses lie aspar;
But twenty fauts ye may hae waur—
So blessins on thee, Robin!’
Chorus
Robin was a rovin boy,Rantin, rovin, rantin, rovin,
Robin was a rovin boy,
Rantin, rovin Robin!
| The Poetry of Robert Burns | |