 |
|
 | The Romance of William of Palerne |  |
94
bolde burwes for-brent a-boute on eche side,
& euer as þe witty werwolf wold hem lede,
faire þei him folwed as here frend holde.
& so longe he hem ladde as he him-self þouȝt,
he brouȝt hem to a borwȝ þat bold was & riche,
& fairest of alle fason for eny riche holde,
þat euer man vpon mold miȝt on loke.
perles was þe paleis and palerne it hiȝt.
þe werwolf wan william ferst fro þat place,
whan he was in childhod as þe chaunce be-fore told.
& treuli, riȝt þat time to telle al þe soþe,
williams moder in meschef wiþ moche folk þere lenged;
for þe king of spayne bi-seged hire harde,
In maner as þe mater was minged bi-fore.
a pris place was vnder þe paleys a park as it were,
þat whilom wiþ wilde bestes was wel restored;
but þe segges þat held þe sege had it al destruyt.
þe hert & þe hinde þere þanne hem hed sone,
as þe werwolf hem wissed þat ay was here gye,
vnder a coynte crag fast bi þe quenes chaumber,
& al þat day in þat den þei darked, & þe niȝt;
þe werwolf went wiȝtly & whan hem mete & drink,
so þat þei mad hem as murie as þei miȝt þat time.
now of þe buxum bestes be we a while stille,
& carpe we of þe curteys quen þat in þe castel lenged.
| The Romance of William of Palerne | |