Sweet William and May Margaret
SWEET WILLIAM'S GHOST—E
[_]
Kinloch's Ancient Scottish Ballads, p. 241.
1
As May Margret sat in her bouerie,
In her bouer all alone,
At the very parting o midnicht
She heard a mournfu moan.
2
‘O is it my father? O is it my mother?
Or is it my brother John?
Or is it Sweet William, my ain true-love,
To Scotland new come home?’
3
‘It is na your father, it is na your mother,
It is na your brother John;
But it is Sweet William, your ain true-love,
To Scotland new come home.’
4
‘Hae ye brought me onie fine things,
Onie new thing for to wear?
Or hae ye brought me a braid o lace,
To snood up my gowden hair?’
5
‘I've brought ye na fine things at all,
Nor onie new thing to wear,
Nor hae I brought ye a braid of lace,
To snood up your gowden hair.
6
‘But Margaret, dear Margaret,
I pray ye speak to me;
O gie me back my faith and troth,
As dear as I gied it thee.’
7
‘Your faith and troth ye sanna get,
Nor will I wi ye twin,
Till ye come within my bouer,
And kiss me, cheek and chin.’
8
‘O should I come within your bouer,
I am na earthly man;
If I should kiss your red, red lips,
Your days wad na be lang.
9
‘O Margaret, dear Margaret,
I pray ye speak to me;
O gie me back my faith and troth,
As dear as I gied it thee.’
10
‘Your faith and troth ye sanna get,
Nor will I wi ye twin,
Till ye tak me to yonder kirk,
And wed me wi a ring.’
11
‘My banes are buried in yon kirk-yard,
It's far ayont the sea;
And it is my spirit, Margaret,
That's speaking unto thee.’
12
‘Your faith and troth ye sanna get,
Nor will I twin wi thee,
Till ye tell me the pleasures o heaven,
And pains of hell how they be.’
13
‘The pleasures of heaven I wat not of,
But the pains of hell I dree;
There some are hie hangd for huring,
And some for adulterie.’
14
Then Margret took her milk-white hand,
And smoothd it on his breast:
‘Tak your faith and troth, William,
God send your soul good rest!’
