University of Virginia Library

lucifere
To whos wurchipe synge ȝe þis songe
to wurchip god or reverens me
but ȝe me wurchipe ȝe do me wronge
ffor I am þe wurthyest þat evyr may be.

Angeli boni
We wurchipe God of myth most stronge
whiche hath fformyd bothe vs and the
we may nevyr wurchyp hym to longe
Ffor he is most worthy of mageste
On knes to god we ffalle
oure lorde god wurchyp we
And in no wyse honowre we the
A gretter lord may nevyr non be
than he þat made us alle.

lucifere
A wurthyer lord forsothe am I
and worthyer than he Euyr wyl I be
In evydens þat I am more wurthy
I wyl go syttyn in goddys se
Above sunne and mone and sterrys on sky
I am now set as ȝe may se
now wurchyp me ffor most mythy
and for ȝour lord honowre now me
Syttyng in my sete.

angeli mali
Goddys myth we for-sake
and for more wurthy we þe take
þe to wurchep honowre we make
and ffalle down at þi ffete.

Deus
Thu lucyfere ffor þi mekyl pryde
I bydde þe ffalle from hefne to helle
And all þo þat holdyn on þi syde
in my blysse nevyr more to dwelle
At my comawndement anoon down þou slyde
with merth and joye nevyr more to melle
In myschyf and manas evyr xalt þou abyde
in byttyr brennyng and fyer so felle
in peyn evyr to be pyht.

lucyfere