University of Virginia Library

38. On the “Leaps” Which Christ Took

Quare velociter ascendit Ihesus tantum spacium in momento . . . .
Also crist steȝ vp hastely . In on stonde so fer to go
Os dauid in his prophecy . told be fore hit schuld be so
Exultauit ut gigas ad quendam viam &c
But how fer he lepe ȝe schyn se . As þe philosophur says here
Raby moyses leue ȝe me . þat writes of hit in þis maner
He says Vij heuenes þer ben . & Vij planetes eke al so
& vche planet & heuen be twene . as myche space as mon schuld go
Of playne way in .V. hundret ȝere. & space bytwen vchon of þo
Os myche space as vche heuon þat is clere. on wydnes beþ boþe two
So þat þe space þat by twene is . fro heuon to heuon as says he
Of as gret wydnes I wys . As is vche of quantyte
þen Vij heuones to akount . & Vij spaces hem bytwene
And for to rekon wel aryȝt . from myddes of þe vrþe here
to þe hyȝschip & hyȝt of þe seuenþe heuon Iii were
þe whyche saturnus called is. Vii þousand hundred & vii space
Os myche as mon schild go I wis . in so long while & he had grace
Ond to acount vche jorney to fourty myle of euon way
Os vche myle leue ȝe me . two þousant cubytes soþe to say
Ond put al so to vche ȝere iij . hundred days & syxty
þus haue I acounted here. how crist lepte þorow his mercy
to Vij. þousand hit wyl amounte . ȝif þay truly metun ben