University of Virginia Library

Cassibel rex.

Þo þis feste ȝare was þat folc verst in is wise
To hor godes as hii wolde dude hor sacrefice
Þer after hii sete at hor mete wiþ gret nobleie echon
Þat me nuste þer biuore so noble feste non
After mete as riȝt was þe menestraus eode aboute
& kniȝtes & swaines In karole gret route
So þat þe kinges neueu & þe erles neueu of kent
Þe tueie ȝonge bachelers þat noble were & gent
In þat noble tresche strif bigonne arere
So þat þe herles neueu þen oþer slou riȝt þere
Þo was al þe court anuyd as he moste nede
Þe king verde ek vor wraþþe as he wolde awede
Androge he sende word þat he is neueu toke
& broȝte him vorþ to auonge þat þe court him wolde loke
Androge was adrad vor he nuste þe kinges wille
& loþ he adde is neueu to hongi oþer spille
Þe king he sende word aȝen þat he adde is franchise
In is owe court vorto loke domes & assise
& þat ȝif is neueu adde misdo In is owe court he ssolde
Ansuerie þat echman to him siwi wolde
Þo þe king hurde þis þat he ne miȝte bi no lawe
Iugi him þat his neueu broȝte of lifdawe
He greiþede is ost faste vpe þis erl of kent
To bringe is neueu mid strengþe to stonde to Iugement
Oþer mid fure oþer mid swerd bringe he wolde al out
Him to noȝte & al is þing nere he no so proute
Þis erl bi grete louerdes to þe king ofte sende
Þat he ssolde vor godes loue is herte somdel amende
& þat he vor is neueu wolde vorto abatie strif
Do hey amendement sauue lume & lif