Songs, Carols, and other Miscellaneous Poems, from the Balliol Ms. 354, Richard Hill's Commonplace book | ||
32
41. [The Stoning of St. Stephen.]
Nowe syng we both all & sum:
Lapidauerunt Stephanum.
1
Whan seynt Stevyn was at Jeruzalem,Godis lawes he loved to lerne:
Þat made þe Jewes to cry so clere & clen,
Lapidaverunt Stephanum.
[Nowe syng we both all & sum:
Lapidauerunt Stephanum.]
2
The Jewes þat were both false & fell,Agaynst seynt Stephyn they were cruell,
Hym to sle they made gret ȝell,
& lapidaverunt Stephanum.
[Nowe syng we both all & sum
Lapidauerunt Stephanum.]
3
They pullid hym with-owt the town,& than he mekely kneled down,
While the Jewes crakkyd his crown,
Quia lapidaverunt Stephanum.
[Nowe syng we both all & sum:
Lapidauerunt Stephanum.]
4
Gret stones & bones at hym they caste,Veynes & bones of hym they braste,
& they kylled hym at the laste,
Quia lapidaverunt Stephanum.
[Nowe syng we both all & sum:
Lapidauerunt Stephanum.]
5
Pray we all þat now be here,Vnto seynt Stephyn, þat marter clere,
To save vs all from the fendis fere.
Lapidauerunt Stephanum.
[Nowe syng we both all & sum:
Lapidauerunt Stephanum.]
Songs, Carols, and other Miscellaneous Poems, from the Balliol Ms. 354, Richard Hill's Commonplace book | ||