Special declaracioun of the houres of planetes.
Understond wel that evermo, fro the arisyng of the sonne til
it go to reste, the nadir of the sonne shal shewe the houre of
the planete; and fro that tyme forward al the night til the sonne
arise, than shal the verrey degre of the sonne shewe the houre
of the planete.
Ensample as thus: The xiij day of March fyl upon a Saturday,
peraventure, and atte risyng of the sonne I fond the secunde
degre of Aries sittyng upon myn est orisonte, all be it that it
was but litel. Than fond I the 2 degre of Libra, nadir of my
sonne, discending on my west orisonte, upon which west orisonte
every day generaly, atte sonne arist, entrith the houre of eny
planete, after which planete the day berith his name, and endith
in the next strike of the plate under the forseide west orisonte.
And evere as the sonne clymbith upper and upper, so goth his
nadir downer and downer, teching by suche strikes the houres of
planetes by ordir as they sitten in the hevene. The firste houre
inequal of every Saturday is to Saturne, and the secunde to
Jupiter, the thirde to Mars, the fourthe to the sonne, the fifte
to Venus, the sixte to Mercurius, the seventhe to the mone. And
then ageyn the 8 is to Saturne, the 9 to Jupiter, the 10 to Mars,
the 11 to the sonne, the 12 to Venus. And now is my sonne gon to
reste as for that Saturday. Than shewith the verrey degre of the
sonne the houre of Mercurie entring under my west orisonte at
eve; and next him succedith the mone, and so furth by ordir,
planete after planete in houre after houre, all the nyght longe
til the sonne arise. Now risith the sonne that Sonday by the
morwe, and the nadir of the sonne upon the west orisonte shewith
me the entring of the houre of the forseide sonne. And in this
manere succedith planete under planete fro Saturne unto the mone,
and fro the mone up ageyn to Saturne, houre after houre generaly.
And thus knowe I this conclusyoun.
