University of Virginia Library

When þe douke Otus y-seye þat cas,
Þat Gij so sore wounded was,
Þerl Lambard he cleped to him
(A kniȝt he was stout & grim),
& fiftene kniȝtes in his compeynie,
Þat were strong men and hardie.
On a dern stede he dede hem hide,
Þer as Gij schuld cum ride;
‘Lordinges,’ þan seyd þe douk Otoun,
‘Under-stond to mi resoun:
Mine men ȝe beþ & to me swore,
Omage ȝe schul me þer-fore.
Mine hest ȝe schul ful-fille,
Þat ich ȝou bid, wiþ gode wille.
Me to wreken ȝe schul go
Of a treytour þat is mi fo,
Þat is y-comen vp mi lond
(Wer he þenkeþ to bring me an hond),
Gij of Warwike þat wounded is
Wiþ a swerd þurch þe bodi y-wis.
On þe halidom ȝe schul me sweri:
In þe forest of Pleyns þat is so miri,
Þer ȝe schul ȝou al hide,
Þer Gij of Warwike schal cum ride:
His bodi oliue ȝe schul me bring,
And slen his feren eld & ȝing.
Y schal him in mi prisoun do;
Out no comeþ he neuer mo.
Wiþ sorwe and wo he schal þer ende:
Þennes no schal he neuer wende.’