Andria :: :: University of Virginia Library

Here misis spekth to glycery being wyth ī the house.
Misis
/Pamphilus/Carinus/Dauus.
I will indeuer me in all that I may
Thy pamphilus to fynde And bryng hym to the
Veex not thy self the whyle I the pray

P.
O mysis.

M.
who is that o pamphile
Thow comist very well.

P.
what is it tell me

M.
My maystres bad me pray you if that ye
Louyd her to com to her for fayn she wold you se.

P.
O I Am vndon my harm now doth increace
O dauus is it mete that both she & me
Thow sholdist so troble by thy bysynes
ffor I am send for bycause that she
Knowith the weddingis vnto me to be

C.
ye & these thingis in rest might haue gone
yf this knaue here wold haue let theym Alone

D.
Go to now make thow hym more mad
yf he of his owen will be not mad I now

M.
That is the cause that she is so sad
And that causeth her to haue this sorow

P.

Misis by all the goddis I swere the now
That Whyle I lyue I will not her forsake
Though I wist all mē as enmys wolde me take

I haue her chosyn mete to myne estate
As happys our maners agre/farwell let them go
That will betwene vs put any debate
This mynd saue deth no man shall take me fro

C.
I take hart agrace.

P.

not the answer of Apollo
Is trewer then this/but if it may be
It shalbe that my fader shall not thynk me.

The weddynges to wythstād but yf it will not be
I will so do that he shall playnly know
Me them to wythstand/& what I am for suerte

C.
As wretchyd as I.

D.
my wittis I do bestow
To seke remedy.

C.
a Ioly felow

P.
I wot well Inough what thou goest about

D.
That that I begyn I trust to fynysh owt

P.
Now it is nede.

D.
And now I haue it lo

C.
What is it.

D.
All to hym & nothing to the
Trust not to it.

C.
I am cōtent.

P.
what wilt thou do

D.
This day I trow will not suffyse me
For that that I must do ye may beleue me
So haue I no tyme thys thing to declare here
Therfore get ye hens for ye me hynder

P.
I will go se her.

D.
whether wilt thou go

C.
Shall I say trewth.

D.
dost thou begyn to say
A sermon to me.

C.
what shall of me be do

D.
what fole doth not thys suffice the for this day
I will get the some tyme for I will put away
The mariagis from him.

Ca.
yet neuertheles

D.
what.

c.
that I may haue her.

d.
o fole of folyshnes

C.
yf thow haue any thyng yet come to me

D.
what shall I come I haue no maner thing

C.
yet if thou haue.

D.
well I come to the

C.
yf thou come home I wilbe there remaynyng

D.
Mysys thou must a while here be taryeng
whyle I go.

M.
why.

D.
for it is necessary

My.
Hye the hens.

D.
I wilbe here agayn shortly.