University of Virginia Library

Loke pater noster þou be sayande,
to þo chalyce he be saynande:
þen tyme is nere of sakring.
A litel belle men oyse to ryng,

(Elevatio)

þen shal þou do reuerence
to Ihesu Crist awen presence,
þat may lese alle baleful bandes;
knelande holde vp bothe þi handes,
And so þo leuacioun þou be-halde.
for þat is he þat Iudas salde,
and sithen was scourged & don on rode,
and for mankynde þere shad his blode,
and dyed & ros & went to heuen,
and ȝit shal come to deme vs euen,
Ilk mon aftur he has done;
þat same es he þou lokes o-pone.
Þis is þo trouthe of holy kirk,
who trowes noght þis mone sitt ful myrk;
for-þi I rede with gode entent
þat þou biholde þis sacrament.
Swilk prayere þen þou make,
als lykes best þe to take;—
sondry men prayes sere,
Ilk mon on his best manere.
Short prayere shulde be, with-outen drede,
and þer-with pater noster & þo crede.
If þou of ane be vn-puruayde,
I set here ane þat may be sayde;
þof I merk hit here in lettir,
þou may chaun[ge] hit for a bettir: