Poems by Robert Nicoll :: :: University of Virginia Library

A wee raggit laddie he cam' to our toun,
Wi' his hair for a bannet—his taes through his shoon:
An' aye when we gart him rise up in the morn,
The ne'er-do-weel herdit the kye 'mang the corn:
We sent him to gather the sheep on the hill,—
No for wark, but to keep him frae mischief an' ill;—
But he huntit the ewes, an' he rade on the ram!
Sic a hellicat deevil was Minister Tam!

My auld Auntie sent him for sugar an' tea,—
She kent na, douce woman! how toothsome was he:—
As hamewith he cam' wi't he paikit a bairn,
An' harried a nest doun amang the lang fern;
Then, while he was restin' within the green shaw,
My auld Auntie's sugar he lickit it a':—
Syne a drubbin' to miss, he sair sickness did sham:
Sic a slee tricksy shangie was Minister Tam!

But a Carritch he took, when his ain deevil bade,—
An' wi' learnin' the laddie had maistly gaen mad;
Nae apples he pu'ed now, nae bee-bikes he smored,
The bonnie wee trouties gat rest in the ford,—
Wi' the lasses at e'enin' nae mair he would fight—
He was learnin' and spellin' frae mornin' to night:
He grew mim as a puddock an' quiet as a lamb,—
Gudesakes! sic a change was on Minister Tam?

His breeks they were torn an' his coat it was bare;
But he gaed to the school, an' he took to the lear:
He fought wi' a masterfu' heart up the brae,
Till to see him aye toilin' I maistly was wae:
But his wark now is endit,—our Tammie has grown
To a kirk wi' a steeple—a black silken gown,—
Sic a change frae our laddie wha barefooted cam',—
Wi' his wig white wi' pouther, is Minister Tam!