 | |  |
CUM PRIMO POLO. — Metrum 3
"Whan Phebus, the sonne, bygynneth to spreden his clernesse with rosene chariettes, thanne the sterre, ydymmed, paleth hir white cheeres by the flambes of the sonne that overcometh the sterre lyght. (This to seyn, whan the sonne is rysen, the day-sterre waxeth pale, and leeseth hir lyght for the grete bryghtnesse of the sonne.) Whan the wode waxeth rody of rosene floures in the fyrst somer sesoun thurw the breeth of the wynd Zephirus that waxeth warm, yif the cloudy wynd Auster blowe felliche, than goth awey the fairnesse of thornes. Ofte the see is cleer and calm without moevynge flodes, and ofte the horrible wynd Aquylon moeveth boylynge tempestes, and overwhelveth the see. Yif the forme of this world is so zeeld stable, and yif it torneth by so manye entrechaungynges, wiltow thanne trusten in the tumblenge fortunes of men? Wiltow trowen on flyttynge goodes? It is certeyn and establissched by lawe perdurable, that nothyng that is engendred nys stedfast ne stable."
| | |