University of Virginia Library

Brutus.

Corineus herwiþ harde smot & stured him aboute
& made is wey bi eiþer side & percede þe route
Mid þre hondred kniȝtes a duc þat het syward
Asaylede corineus him sulf a uorþ ward
He smot corineus harde inou þat he it stronge velde
& ȝut he hente þene stroc muchedel mid is sselde
Corineus was þo somdel wroþ is ax an hei he drou
& smot him anowarde þat heued mid god ernest inou
& vor clef him al þat heued & þe bodi to gronde
Þo miȝte siward segge þat he adde is per ifounde
Þo corineus was alles wroþ so strong dunt he ȝef
Þat ech bodi þat he smot oþer heued he to clef
Oþer he smot of þen arm oþer hond oþer heued
No lim nas þat he smot mid þe bodi bileued
Amty place he made aboute þat folc fley him vaste
A wonder maister he was on þat hom so couþe agaste
So vaste hii slowe of þis men & adoun hom caste
Þat þe king mid a vewe men him self fleiȝ atte laste
Þo þis bataile was ido brut & corineus
& astored hom aboute mid richesse & chateus
Of corn & win & alle gode & to ssipe vaste drowe
& barnde al þe contreie & þat folc vaste slowe
Þo hii adde al bar imad þe contrei al aboute
& hii were hom sulf wel astored of no þing hii nadde doute
Hii wende hom to ssipe anon & euene hii gonne driue
To þe contreie of tours & þere hii gonne ariue
A veir place hii chose hom & þere hii gonne arere
Walles wide & stronge inou castles as it were
& astored it wel inou & hor god þuder in bere
& abide þen king ȝif he wolde asaily hom þere