TUNC ME DISCUSSA, &c. — Metrum 3
Thus, whan that nyght was discussed and chased awey,
dirknesses forleten me, and to myn eien repeyred ayen hir firste
strengthe. And ryght by ensaumple as the sonne is hydd whan the
sterres ben clustred (that is to seyn,
whan sterres
ben covered with cloudes) by a swyft wynd that hyghte
Chorus,
and that the firmament stant dirked with wete plowngy cloudes;
and that the sterres nat apeeren upon hevene, so that the nyght
semeth sprad upon erthe: yif thanne the wynde that hyghte
Boreas, isent out of the kaves of the cuntre of Trace, betith
this nyght (that is to seyn, chaseth it
awey)
and discovereth the closed day, thanne schyneth Phebus ischaken
with sodeyn light and smyteth with his beemes in merveylynge
eien.