University of Virginia Library

Henricus

Þut folc þat was in þe toun þe ȝates made vaste
& wuste þe toun aȝen him þe biker longe ilaste
So þat mid strengþe sir simon þen toun nom
& robbede & slou vaste þo he wiþinne com
Alle þe gywes of þe toun he let sle echon
Þat me in eni stede fond he ne leuede aliue non
Ac after þulke time of wat him was to done
Lute god cas him biuel as messal ihure sone
Fram þenne he wende to oxenford þre dawes he was þere
Vairore folc ne miȝte be þan wiþ him was þere
Þe gywes he let seche uor to quelle echon
Ac me ne miȝte vor no þing in þe toune finde on
Fram þanene to keningwurþe wiþ is ost he wende
& þere as it fel alas is heie herte him ssende
Vor so muche he tolde of him sulf & of is grete miȝte
Þat him ne deinede noȝt to ligge in þe castel bi niȝte
Sir edward & is ost at wircetre þo were
Hii adde gode aspies hou hii hom þo bere
So þat sir edward & þe erl of gloucetre al so
& sir roger de mortimer & mani god kniȝt þerto
In a lammasse niȝt saterniȝt þat was
Out of wurcetre he wende mid wel god pas
To keningwurþe hii come in þe dawiinge
Hii broȝte sir simon & is men an feble tiþinge
In hor bed hii founde hom in toune þo hii come
Of softe awakiinge hii toke lute gome
Vor to wel cloþi hom hii ne ȝeue hom no tome
Manie hii slowe of hor fon & heie men some hii nome
As sir roberd erl of oxenford & sir willam þer to
De mountchalsi & sir adam de neumarch al so
& sir water de coleuile & oþer manion
Ac sir simond him sulf among alle is fon
In to þe castel of scapede an naked man vnneþe
Ac manion þer was inome & mani ibroȝt to deþe
& þus sir simond þe ȝonge was verst to grounde ibrouȝt
Ac naþeles he ne les þo al is poer nouȝt
Ac gret ost huld inou & ȝarkede in ech ende
Him & al is poer aȝen is fader to wende