University of Virginia Library

Iohannes

Her after þat par auntre ich may him ȝiue ȝute
Anoþer uor þe popes loue & þat nis noȝt lute
Holi churche quaþ pandulf so riȝtuol is & was
Þat he ne ssal no prelat sette adoun wiþoute apert trespas
Ac he ssal princes chasti þat hom doþ eni wou
Nou sir clerc quaþ þe king ȝe mowe þretni ynou
Ower dede ne may be no wors þan ower word is
Nou sir king quaþ pandulf þou sedest vs ar þis
Þe priuete of þin herte & ich þe segge iwis
Þe priuete of oure & wat oure erinde is
Þe pope þe amanseþ & alle þat serueþ þe
Is þer more quaþ þe king pandulf sede ȝe
Þe pope of alle hor sunnes asoileþ alle þe
Barons & kniȝtes þewemen & fre
Clerkes & lewede þat fram þi seruise wol fle
Of sunnes þat hii abbeþ ido ȝuf hii wolle gode be
& to sywi þis mansinge & þe asoylinge al so
We asigneþ þe bissop of winchestre þer to
& of norþwich here in engelond & in scotlonde þer to
Of roucetre & of salesburi þe siwinge to do
In walis þe þre bissopes þat beþ of þe londe
Þoruout al cristindom þe pope send er sonde
To erchebissops & bissops & ȝifþ ech poer
In is bissopriche þe & þine to amansi ver & ner
& of hor misdede to asoyli alle þo
Þat aȝe þe vaste beþ as godes fo
& siker þou be þat kinges & dukes al so
& erles & barons & kniȝtes þer to
Habbeþ bi souȝt þe pope croiserie biginne
Vpe [þe] & þine & hii wolle þi lond winne
& deliueri it vp þe pope þat he is wille ssewe
& make king wan he wole vor þou ast frend vewe
& we hoteþ in is half & he deþ in his ende
Alle þat cristine beþ þat hii vpe þe wende
& asoileþ hom clene of alle hor misdede
Wat miȝte ȝe more ssame do me þe king sede
& in soþnesse we segeþ þe pandulf sede þo
Þat þou ne berst neuereft croune ne þin eir naþemo