University of Virginia Library

& after sein Micheles day þe þridde day he com
To douere & þe bissop of londone wiþ him nom
& þe bissop of eli & þe king sone wende
To a maner þer biside & to hom anon sende
Is heye Iustice of is lond sir G le fiȝ peris
Þat ȝuf þe erchebissop oþer eni of his
Wolde eni þing toward him þat hii sende him libel
& esste ek articles þat nere noȝt to graunti wel
Ac vor it nas bote al þe mase þe erchebissop sone
Wende aȝen ouer se as best was to done
Þo was richard ibore þe kinges sone ich wene
As in þe ȝer of grace tuelf hundred & tene
Þat suþþe was king of alemayne þat at hailes ibured is
Þe ordre bigan of frere menors þulke sulue ȝer ywis
Þe king bigan þo more wo vor he harlede vaste
Þe gywes verst of þis lond & in prison caste
Vort sixe & sixti þousend marc hii paiden him atten ende
He bigan ek greye monekes vaste aboute ssende
Vor gret raunson he esste of hom to helpe him spene
Vor defendi is lond & is worre to soustene
Hii ansuerede alle at o word þat no tresour hii nadde
Þat hii adde poer of bote as godemen hadde
Bitake hom in warde uor hor soule to do
In almesdede & orisouns & to sousteini pouere al so
& nouȝt to sosteini worre & þo þe king hurde þis
Vor wraþþe he let in al is lond þat alle hor chartren ywis
Þat adde of is fader & of oþere heiemen al so
Of franchise & of oþer þing al clene were vndo
& alle þat wolde him ssame do aday oþer aniȝt
Robbi oþer quelle þat nomon ne dude hom riȝt
Ne þat bailif ne forester ne soffrede hom nower come
To sowe ne to oþer þing þat hor bestes nere inome
So harde hii were iharled þat hii ne miȝte at om abide
Bote wende to purchasy hor mete aboute ech in is side
Þe erchebissopes wodes ek þe king het echon
Þat me morede al clene vp þat þer ne bileuede non
Þat ech tre were vp mored þat it ne spronge namore þere
He het ek alle þe bissopes þat biȝonde se were
Þat ar missomer day in to þis londe come
Oþer þat his bailifs hor londes hom bi nome
And asailede al in his hond & rentes þer to
So þat al þis atte daye & wel worse was ido
Vor þer nas bissopriche non in is lond
Bote winchestre & norþwich þat he ne huld in is hond
& abbeyes monion so þat cristindom
Was as clanliche al uor ȝite in is kinedom
& þer nas oþer red as alle men iseye
Bote holi churche go adoun oþer som god man þeruore deie
Þer on þoȝte tueye men legates of rome
Pandulf and þe duraund & to engelonde come
As godes kniȝtes baldeliche at gemes tid iwis
Vor to deie vor holi churche oþer amende þat was amis
Þun wei in heruest to þe king baldeliche hii nome
& to him at norþhamtone biuore is conseil come
Sir king hii sede we beþ icome fram verre londe iwis
Vor þe pais of holi churche & þis lond þat þin is
Vorto wite þin ansuere hou þou it wolt bi se
Inot nout quaþ þe king wat ower demande be
Commune riȝt quaþ pandulf we esseþ & nammore
Þat þou suerie vpe þe bok clanliche to restore
Holi churche þat þou hast him binome mid wronge
& þat þe erchebissop in þis lond in pes þou auonge
Nou icholle quaþ þe king þat ȝe min wille ise

Ȝe mowe me makie suerie wat owe wille be
Ac inel neuere þe erchebissop in engelonde auonge
Þat inelle wan he comþ late him heye an honge
Woltou sire quaþ pandulf eni oþer telle
Ichabbe ised quaþ þe king & non oþer segge inelle
Þou hast nou quaþ pandulf þe pope bisout
Þat he relesi þe entredit ac me þincþ it is uor noȝt
Ac it is to holden vp & vastore more to do
Nai sire quaþ þe king ine willi noȝt so
Ac vor loue of mi louerd þe pope icholle do þis

Ȝiue þe erchebissopriche wan so is wille is
& icholle wan so he it ȝifþ vawe auonge þerto
An Maister steuene of langetone may so wel do