University of Virginia Library

Endlang the wallys kyrnellys euerystand,
The bruyt and clamour rayss fra hand to hand;
Thar bustuus bowys keynly do thai bend,
Scharp querrellis and castyng dartis furth send,
Quhilk thai with lyamys and thwangis lang owt threw;
Sa thik the ganȝeis and the flanys flew,
That of schaftis and takillys all the feildis
War strowit, and the large planys ourheldis.
In boss helmys and scheldis the weirly schote
Maid rap for rap, reboundand with ilk stot.
Scharp and awfull incressis the bargane,
Als violent as euer the ȝet doun rane
Furth of the west doith smyte apon the wald
In October, quhen the twa sternys cald,
That clepyt beyn the Kyddis, first vpspryngis;
And als thik as the hail schour hoppys and dyngis
In furdys schald, and brays heir and thar,
Quhen trublit beyn the hevynnys and the ayr
With stormy tempest and the northyn blastis,
Quhill clowdis clattris, and all the lyft ourcastis.
Pandarus and Bytias, twa brethir germane,
By Alcanor engendryt, that Troiane,
Quham Hybera, the wild foresteress knaw,
Bred and vpbrocht in Iovys haly schaw,
Sa byg ȝong men thai war, sa gret and wight,
That equale semyt thame tobe of hight
With fyr treis of thar landis or hillys;
And tharto eik sa egyr of thar willis
At thai the port, quhilk be Eneas charge
Was commandyt to kepe stekit, all at large
Has warpyt oppyn onbreid to the wall,
And baldly dyd thar fays clepe and call
To entyr, gyf thai durst, and thame assay,
Sa gret confidens in thar forss had thai.
And thai within stude by the ȝet, that tyde,
Quhilk oppin was on the rycht and left syde,
As thai had towris beyn baith gret and squar,
Enarmyt with thar wapynnys brycht and bar,
The hie tymbrettis of thar helmys schane—
Lyke tobehald as bustuus akis twane
Besyde the beyn ryver Athesys grow,
Or flowand fludis bankis of the Pow,
Vpstrekand thar byg croppys to the ayr,
And onsned branschis wavand heir and thar.
Alsswith as the Rutylianys dyd se
The ȝet oppyn, thai rusch to the entre,
Quercens formast, and Equycoly,
A lusty knycht in armys rycht semly,
Wight Tynarus, ferss myndyt to assaill,
And bald Hemon, with curage marcyall.
Bot thai with all thar complicis in fyght
War dung abak, and constrenyt tak flycht,
By Troiane rowtis, or than in that stryfe
Quha that abaid lost in the port thar lyfe.
The brymmar grew thar ferss mudis within,
So that the Troianys can flok and sammyn ryn
Towart that place, and maid felloun debait;
So bald thai wolx that in the plane gait,
Ischand without the portis on the land,
Thai durst recontyr thar fays hand for hand.
A messynger to Turnus come that tyde,
That wondir fersly at ane othir syde
The town assalȝeis; and thar he til hym schew
Quhat hait slauchter hys fays maid of new,
And sik a port had all wyde oppyn set.
Hys first purposs he left, and to that ȝet,
With felloun ire movit, furth sprent he tho,
Towart the Troianys and prowd brethir two;
And fyrst hes slane byg Antyphates,
That him on cace met formest in the press,
Son to the bustuus nobill Sarpedon,
In purchess get a Thebane wench apon.
Hym smate he down with the cast of a dart;
The fleand schaft Italian to his hart
Glydand, throw owt the schire ayr duschit sone,
The stomok persyt, and in the cost is done.
The how cavern of his wond a flude
Furth bruschit of the blaknyt dedly blude;
So deip the grundyn steill hed owt of sycht is,
Ful hait and warm it festnyt in his lychtis.
Syne Meropes and Erymanthus he
And Aphydnus slew with his hand al thre;
And efter that, with a stern mynd full teyn,
Slew Bytias, for al his glowrand eyn,
Bot that was nother with dart, swerd nor knyf
(For na sik wapyn mycht him haue reft the lyfe),
Bot with ane hydduus byssand fyry speir,
That clepit is “phalarica” in weir,
Quhilk with sa vehement fors this Turnus threw
That as the thundris dynt at him it flew,
Quham nowder scheld of twa bull hydis thik,
Nor ȝit the dowbill malyt traste hawbrik,
All gilt with gold, mycht it resist nor stynt.
The bustuus body down duschit of the dynt,
Quhil all the erd to granyt with a rattill;
The hydduus scheild abufe him maid a brattill—
Lyke as the hie pillar of marbill stone
Standand apon the cost Euboycon,
Vmquhile besyde Bais, the rych cite,
With grysly swecht down duschit in the see;
Quhilk was of ald of massy stanys a byng,
And by the fludis sik wyss doun was dyng,
Hys fall drew down the cite quhar it stude,
And ruschit in a fer way in the flude;
The seys mixt ourran, and all ourhed
Blak slyke and sand vp poplit in the sted;
Quhill of the feirfull sovnd the ilandis twa
Trymlyt, Inaryme and eik Prochita;
Quhil Inaryme, at Iupiteris command,
Full hard bed is to Typheus the gyand.
At this tyme Mars, the god armypotent,
Ekyt the Latynys fors and hardyment,
With felloun ire prikland so thar myndis
That as hym lyst he turnys so and wyndis;
And makis the Troianys tak the flycht gud speid,
On thame he kest sik feir and schamfull dreid.
The Latyn pepill flokkis on euery syde
Quhen thai beheld the port sa oppynnyt wyde,
Seand thai had a rowm to fecht at will;
The god of stryfe thar curage steris thartill.