University of Virginia Library

Reherce þis oft in þi þoght,
to þo gosple be don, for-gete hit noght;
Som-where bi-syde, when hit is done,
þou make a cros, and kys hit sone.
Men oen to saie þo crede som-tyme:
when þai saie hore, loke þou saie þine,
þis þat folouse in englishe letter—
I wold þou sayde hit for þo better.
bot þai say hore, say þou non ellis,
bot do forthe after als þis boke tellis.
Here-to loke þou take gode hede,
for here is wryten þin englyshe crede:

(Credo)

I trow in god, fader of might,
þat alle has wroght,
heuen & erthe, day & night,
And alle of noght.
And in Ihesu þat gods son is
al-onely,
bothe god & mon, lord endles,
In him trow I;
thurgh mekenes of þo holy gast
þat was so milde,
he lyght in Mary mayden chast,
be-come a childe;
vnder Pounce Pilat pyned he was,
vs forto saue,
done on cros & deed he was,
layde in his graue;
þo soul of him went in to helle,
þo sothe to say;
vp he rose in flesshe & felle
þo thryd day;
he stegh til heuen with woundis wide
thurgh his pouste;
Now sittes o-pon his fader right syde
In mageste;
þeþin shal he come vs alle to deme
In his manhede,
qwyk & ded, alle þat has ben
In Adam sede.
Wel I trow in þo holi gost,
And holi kirc þat is so gode;
And so I trow þat housel es
bothe flesshe & blode;
of my synnes forgyfnes,
If I wil mende;
vp-risyng als-so of my flesshe,
and lyf with-outen ende.