The English and Scottish Popular Ballads :: :: University of Virginia Library

Jamieson's Popular Ballads, I, 126; “taken down by Dr Leyden from the recitation of a young lady, Miss Robson, of Edinburgh, who learned it in Teviotdale.”

1

‘At Fyvie's yetts there grows a flower,
It grows baith braid and bonny;
There's a daisie in the midst o it,
And it's ca'd by Andrew Lammie.

2

‘O gin that flower war in my breast,
For the love I bear the laddie!
I wad kiss it, and I wad clap it,
And daut it for Andrew Lammie.

3

‘The first time me and my love met
Was in the woods of Fyvie;
He kissed my lips five thousand times,
And ay he ca'd me bonny,
And a' the answer he gat frae me,
Was, My bonny Andrew Lammie!’

4

‘Love, I maun gang to Edinburgh;
Love, I maun gang and leave thee!’

303

‘I sighed right sair, and said nae mair
But, O gin I were wi ye!’

5

‘But true and trusty will I be,
As I am Andrew Lammie;
I'll never kiss a woman's mouth
Till I come back and see thee.’

6

‘And true and trusty will I be,
As I am Tiftie's Annie;
I'll never kiss a man again
Till ye come back and see me.’

7

Syne he's come back frae Edinburgh
To the bonny hows o Fyvie,
And ay his face to the nor-east,
To look for Tiftie's Annie.

8

‘I hae a love in Edinburgh,
Sae hae I intill Leith, man;
I hae a love intill Montrose,
Sae hae I in Dalkeith, man.

9

‘And east and west, whereer I go,
My love she's always wi me;
For east and west, whereer I go,
My love she dwells in Fyvie.

10

‘My love possesses a' my heart,
Nae pen can eer indite her;
She's ay sae stately as she goes
That I see nae mae like her.

11

‘But Tiftie winna gie consent
His dochter me to marry,
Because she has five thousand marks,
And I have not a penny.

12

‘Love pines away, love dwines away,
Love, love decays the body;
For love o thee, oh I must die;
Adieu, my bonny Annie!’

13

Her mither raise out o her bed,
And ca'd on baith her women:
‘What ails ye, Annie, my dochter dear?
O Annie, was ye dreamin?

14

‘What dule disturbd my dochter's sleep?
O tell to me, my Annie!’
She sighed right sair, and said nae mair
But, O for Andrew Lammie!

15

Her father beat her cruellie,
Sae also did her mother;
Her sisters sair did scoff at her;
But wae betide her brother!

16

Her brother beat her cruellie,
Till his straiks they werena canny;
He brak her back, and he beat her sides,
For the sake o Andrew Lammie.

17

‘O fie, O fie, my brother dear!
The gentlemen'll shame ye;
The Laird o Fyvie he's gaun by,
And he'll come in and see me.

18

‘And he'll kiss me, and he'll clap me,
And he will speer what ails me;
And I will answer him again,
It's a' for Andrew Lammie.’

19

Her sisters they stood in the door,
Sair grievd her wi their folly:
‘O sister dear, come to the door,
Your cow is lowin on you.’

20

‘O fie, O fie, my sister dear!
Grieve me not wi your folly;
I'd rather hear the trumpet sound
Than a' the kye o Fyvie.

21

‘Love pines away, love dwines away,
Love, love decays the body;
For love o thee now I maun die;
Adieu to Andrew Lammie!’

22

But Tiftie's wrote a braid letter,
And sent it into Fyvie,
Saying his daughter was bewitchd
By bonny Andrew Lammie.

23

‘Now, Tiftie, ye maun gie consent,
And lat the lassie marry;’
‘I'll never, never gie consent
To the trumpeter of Fyvie.’

24

When Fyvie looked the letter on,
He was baith sad and sorry:
Says, The bonniest lass o the country-side
Has died for Andrew Lammie.

25

O Andrew's gane to the house-top
O the bonny house o Fyvie,

304

He's blawn his horn baith loud and shill
Oer the lawland leas o Fyvie.

26

‘Mony a time hae I walkd a' night,
And never yet was weary;
But now I may walk wae my lane,
For I'll never see my deary.

27

‘Love pines away, love dwines away,
Love, love decays the body;
For the love o thee now I maun die;
I come, my bonny Annie!’