University of Virginia Library

Gij of þe douke toke his leue,
Ac he it him ȝaf wele vnneþe.
Anouȝ he him bede of siluer & gold,
Ac he þerof nouȝt nim nold.
To þerl Tirri he ȝede þo,
& þis wordes seyd him to:
‘Sir erl Tirri,’ seyd Gij,
‘Now ichil gon, sikerli,
Vnto mi cuntre into Inglond
(Þat way no may y nouȝt wiþstond),
Mine fader & min frendes to se:
Y not ȝif þai oliues be.
Seuen ȝer & more agon it is
Þat ich in þat cuntre was, y-wis.
Ȝif it bitide ani-þing sone
Þat þou haue wiþ me to don,
Be it in pes oþer in werre,
Wheþer it be ner or ferre,
Anon riȝt sende after me:
Ichil come anon to þe,
Þat ich no fot hot com to þe
Al sone as ich þi sond y-se.
Þi wer we haue ouer-com,
& þou hast spoused þi loue.
Destrud we haue ȝour fon,
Erls, barouns mani on.
Þi lond we han brouȝt in pes:
No bestow neuer iuel at esse.
Þou art a kniȝt of miȝti dede:
Of þine fon þarf þe nouȝt drede.
Alle min estris of Inglond
Sende ichil to [þe bi] mi sond,
& þou schalt to me also:
Alle þine wille sende me to;
& ich me self wille com to þe
Sone so ich mi time may se.’