University of Virginia Library

Gij went forþ fulleliche wiþalle:
Was him þer no nedes to duelle.
On ich side he seye come kniȝtes,
Burieys, and seriaunce redi to fiȝtes
Wiþ alle þat crie of þat cuntre:
Wiþ hem nomen no wold ben he.
Him no was þer nouȝt worþ to abide:
He priked his hors & gan to ride.
Into a forest he gan to go.
Oft his stede he wiþ-went þo:
Mani he wounded, & mani he slouȝ
Of kniȝtes þat wer gode y-nouȝ.
Gij ferd forþ swiþe wiþ-alle
Opon his stede, þat bar him snelle.
Þurch þe forest swiþe he rode.
Þerl him oȝein went wiþouten abode.
Michel sorwe he made, y-pliȝt,
For his sone awreke he no miȝt.
His sone anon biri he dede
In a chirche bifore þe auter in þat stede.
Alle þat day Gij forþ rod,
Alle what þe sonne adoun glod:
Of alle niȝt he no blan rideinge
Fort amorwe in þe daweinge,
So þat he to Loreyin com:
Þe cuntres he knewe anon.
Wel riȝt he ȝede to þat cite:
Ichon þer fond he,
Alle þe best þat weren þare:
For him þai had michel care.
When þai him hole & sounde y-seþ
Of his coming glad hij beþ.

Gij hem told þe soþe, y-wis,
Hou he fram þerl aschaped is.
Alle þai þonked god þo,
Þat deliuerd him of his wo.
Seþþen wold he nouȝt long duelle,
To his cuntre he wold snelle.