University of Virginia Library

Edgar

& so he dude for þo he was after is broþer king
He broȝte al þat lond in pes þat er was in striuing
He vndude alle þe luþer lawes þat me huld biuore
& gode lawes broȝte vorþ þat er were as uorlore
Scotlond & norþhumberlond & walis al so
Wiþoute heste to him come is wille vor to do
Þe erþe ȝeld betere & þet weder was murgore bi is daye
& lasse tempeste in þe se þan me er ysaye
Me tolde him of seint dunston þat is broþer drof of londe
After him he sende anon & he com þoru is sonde
& is abbeye aueng in pes fram wan he was so longe
& was þe kinges conseiler & vaire was vnderuonge
Erchebissop of kaunterbury þoru þis gode kinge
Sein dunston was suþþe ymad þe more god to bringe
Þis king also at glastingbury as he þeruorþ com
Seint aþelwold þat was þere monek out of þe house he nom
& ȝef him an place in barkssire þat moche is in mone
Vif mile bisouþe oxenford þat me clupeþ abindone
Þis holy mon seint aþelwold bulde þere uaste
& a uayr abbeye þer bigan þat euereft aþ ylaste
Verst abbot he was þere him sulf & monekes to him nom
In þis manere abindone verst to abbeye com
Hit biuel þat þe bissop of winchestre was ded
Þe king him made bissop þer þoru sein dunstones red
Atte heye chirche of winchestre þere is se was ydo
Þat me clupede chirche cathedral & ȝut me deþ al so
Canons þer were seculers þo he verst þuder com
Ferce men & proute þat moche were in hordom
Þe king & seint aþelwold aȝen hom sette vaste
& out of hor hous & of hor rentes ech after oþer caste
& made an hous of monekes to holde hor ordre bet
Þe monekes out of abendone verst were þuder yuet
Of seint swithin þat hous was as it is ȝut al so
So þat out of abendone hit was verst ydo
In þe secunde ȝere þat he verst bissop was
Þis gode king & he dude þis gode cas
& ek in þe vifteþe ȝere of þe kinges kinedom
Seint aþelwold verst bissop was & þe bissopriche nom