The Story of England by Robert Manning of Brunne, A.D. 1338. Edited from mss. at Lambeth Palace and the Inner Temple, by Frederick J. Furnivall |
De fuga Romanorum. |
The Story of England | ||
De fuga Romanorum.
Þen com þe nyght, gon was þe day,& ilka party ȝede þer way.
Þe Romayns syde was nought payd,
Logges non hadde, þey were dismayed;
Wery þey were, & yuel lykande,
ffor wiþ þe Brutons þey myght nout stande.
Þey toke conseil a-wey to wende,
No lenger in þys lond to lende;
ffor þe contre knew þey nought,
Logge ne recet had þey non wrought;
To schipe þey wente þat ilke nyght,
Vntil fflaundres þey fley þer flyght.
Þe Bretons made blisse, ilkon,
Þat þe Romayns were so gon;
Bot þe kyng made sorewe ynow
ffor Nemnyus, þat to deþe drow;
Medicyne myghte non be founde
Þat myghte hele Nemnyus wounde.
Of sire Nemny nought elles to seye,
Bot þe fiftenþe day Nemny gan deye.
Þey buryed hym in a temple gate,
In London̄, atte Northe gate,
Honurabloker þan an oþer,
ffor he was þe kynges broþer.
The Story of England | ||