University of Virginia Library

Mirabilia Anglie.

Þre wondres beþ in engelond none more inot
Þat water of baþe is þat on þat euere is iliche hot
& verss & newe & euere springeþ ne be þe chele so gret
Swiche baþes þer beþ fale in clos & in þe stret
Vpe þe plein of salesbury þat oþer wonder is
Þat ston heng is icluped non more wonder nis
Evene vp riȝt & sviþe heiȝ þat wonder hit is to se
Þe stones stondeþ þere so grete none more ne mowe be
& oþere liggeþ heie aboue þat man may be of aferd
Þat eche man wondry may hou hii were ferst arered
Vor noþer gyn ne mannes strengþe it þencheþ ne may it do
Telle me ssal herafterward of þes wondres boþe tvo
& hou hii were verst imaked Þat oþer wonder is
Vpe þe hul of þe pek þe wind þere iwis
Vp of þe erþe ofte comþ of holes þei hit were
& blouþ vp of þulke holes so þat it wolde arere
& bere vp grete cloþes ȝif hii were þer nei
& bloue hom here & þere vp in þe luft anhei
Veire weies manion þer beþ in englonde
Ac voure mest of alle þer beþ ich vnderstonde
Þoru þe olde kinges imad ȝwar þorȝ me mai wende
Fram þe on ende of engelond vorþ to þe oþer ende
Fram þe souþ tilþ to þe norþ erninge stret
& fram est to þe west ykenilde stret
Fram douere in to chestre tilleþ watelinge stret
Fram souþest to þe norþwest & þat is somdel gret
Þe verþe is mest of alle þat tilleþ fram totenas
Fram þe on ende of cornewaille anon to cattenas
Fram souþwest to þe norþest to engelondes ende
Fos me clupeþ þilke wei þat bi mani a god toun deþ wende